الرئيسية / عروض وخصومات / كيف تحصل على دعم مادي و تدريبات و استشارات و مساحه عمل مجانا !

كيف تحصل على دعم مادي و تدريبات و استشارات و مساحه عمل مجانا !

السلام عليكم ورحمة الله وبركاته

هااااااااااام جدا لكل الشركات الناشئة والمبدعين المحتاجين دعم مادي علشان يبدوا مشروعهم الخاص

مبدأيا لكل الفريلانسرز اللى مشافوش البوست السابق الخاص باماكن العمل المشتركة المجانية يدخل هنا الاول

مساحة عمل مشترك مجانية من الحكومة المصرية !

اللى عندها افكار ( بدأ في تنفيذها ) وتكون في مجال الاتصالات و التكنولوجيا زي الموبايل او الويب ابلايكيشن… نفس المكان من الحكومة وهو مركز الابداع التكنولوجي وريادة الاعمال في القرية الذكية التابع لوزارة الاتصالات بيدعم افكار المشروعات التكنولوجيه وعايزة حد يساعدها ويدلها على الطريق الصحيح انها تكبر وتبقى بيزنس كبير. بيدعم (دعم مادي و تدريبات و استشارات و مساحه عمل للشركه)

StartIT Incubation Program
البرنامج التابع لمركز الابداع

خلينا نبدأ الاول بالمميزات اللى هتاخدها هناك

– فترة الحضانة او الدعم هي مدة عام كامل
– مكتب خاص مجهز ( فرش واجهزة للفريق ) في مكان مغلق ليك لوحدك ( مش مشترك زي اي مساحة عمل مشتركة ) في القرية الذكية.
– دعم مادي 1200 الف جنيه ( اه زي ما قريت بالظبط ) بس الدعم المادي ده مش هتاخده في ايدك ولكن هيكون على هيئة صورة خدمات استشارية وبرامج وأجهزة حاسب آلي وخدمات تسويقيه مثلا زي تسويق على الفيس بوك او برامج تشتريها او بعثات للفريق برة في مؤتمر او معرض , واي خدمات تانية.
– تدريب واشراف , وده بيكون عبارة عن محاضرات تدريب و توجيه للفريق بتاعك في مجالات كتير هتساعدك جدا زي التسويق والادارة والموارد البشرية وغيرها كتير, وبيكون من ناس كبيرة جدا في المجالات مجانا
– الوصول الى المستثمرين , بيجي هناك كل فترة مستثمرين بيشوفوا الافكار اللى موجودة ولو فكرتك عجبت حد بيتكلم معاك وممكن تلاقي مستثمر يشاركك في فكرتك وتنط لخطوة كبيرة بعد كدة زي ما هنشوف شركات كبيرة هحطها كأمثلة في الاخر بدأت هناك.
– هتاخد في المكتب بتاعك انترنت سريع جدا والمكان مفتوح طول الاسبوع لكل افراد الفريق ( حرفيا طول الاسبوع
– اخر حاجة واهم حاجة هو المقابل اللى بتاخده منك الحكومة وهو لا شئ اطلاقا ولا ايجار ولا نسبة من ارباحك كل حاجة بتاعتك انت والدعم بالكامل مجااااااااااااانا.
——————————————————-

احنا خلصنا فوق الامتيازات اللى بتاخدها لو نجحت في التقديم للبرنامج.

خلينا بقى نتكلم عن الشروط عشان تعدي من اول مرحلة في الفلترة وعشان تتقبل في البرنامج ده:
– اهم شرط هو مجال الفكرة بتاعتك انه يكون تابع لمجال الاتصالات والتكنولوجيا سواء كان سوفت وير او هارد وير وهنشوف امثلة في اخر البوست تحت
– اقل عدد للفريق المشارك فردين 2 ويكون منهم واحد متفرغ تماما للمشروع.
– ان يكون في نموذج مبدئي (بروتوتايب) او ما يثبت انك بدأت في تنفيذ فكرتك بالفعل وجاد فيها .
– اهم حاجة ان يكون عندك خطة عمل business plann كاملة للمشروع ولازم تكون عارف يعني ايه خطة عمل ومحتواها ايه ولو مش فاهم يعني ايه خطة عمل او مش بتعرف تعملها يبقى متقدمش في البرنامج ده دلوقتي ولكن قدم في تدريب لكدة بس في برنامج تاني يعتبر خطوة تأهيلية قبل البرنامج ده مدته 3 شهور وممكن تعرف تفاصيل اكتر عنه من هنا:
https://goo.gl/9iAP3G
– لو مسجل مشروعك او فكرتك او شركتك لازم يكون اقل من سنة لو سنة ويوم بيترفض المشروع .
– مش شرط انك تكون عندك سجل تجاري او بطاقة ضريبية لمشروعك ده المفروض هتعمله هناك لو ربنا كرمك.
– لازم تكون متخرج ( مينفعش طلبة ) ( عشان كدة قولنا متفرغ تماما فوق )
– حاجة مهمة جدا وهي الجدية عشان كل فترة هيتم مراجعة مشروعك ونت وصلت لفين لو لقوك بتلعب هيوقفوا الدعم عشان انت كدة هتبقى بتاخد فرصة غيرك ومش معنى انك منجحتش يبقى بتلعب بس المقصود انك تكون مجتهد وبتعمل كل اللى المفروض يتعمل عشان تكمل مشورك هناك.

– تقدر بعد كدة تعرف كل المواعيد و التقديم وباقي التفاصيل من الرابط ده
https://goo.gl/rmOjMf
– رابط التسجيل في البرنامج
https://goo.gl/nuLeip
—————————————-
—————————————-
دلوقتي الاماكن اللى متاح فيها البرنامج هي الاماكن الخاصة بالقرية الذكية في القاهرة ( بوابة طريق مصر اسكندرية الصحراوي ) واسيوط لو انت في اماكن تانية وبعيد عن دول
في حاجة تانية اسمها احتضان افتراضي وده شامل كل المزايا والشروط اللى فوق والفرق الوحيد انه افتراضي بدون مكتب هناك وده تعرف عنه تفاصيل اكتر من الرابط ده
https://goo.gl/Cv0xCR
————————————
———————————–
خلينا دلوقتي نقول امثلة حية لشركات بدأت هناك ونجحت وبقت في السوق دلوقتي
Bey2ollak.com
Wuzzuf.com
Raye7
Kotobna
Shezlong

وتقدروا تشوفوا شركات اكتر من الرابط ده
https://goo.gl/TJ0u0Z

عن Shreef Entsar

شريف انتصار مصمم صناعي يعمل كمستقل منذ عشرة اعوام تقريبا في مجالات عديدة ومؤسس شركة كريتيفاي نيتورك .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *